الفراخ المكسيكى

طريقة عمل الفراخ المكسيكى 

طعم وريحة وشكل يجنن 

المقادير ..

فرخة مقطعة 8 قطع أو صدور فراخ شرائح , 2 قرن فلفل أخضر مقطع شرائح , 2 بصلة مقطع شرائح , 

كوب عصير طماطم , 5 فص ثوم مفروم , 2 ملعقة كبيرة صلصة طماطم , 3 ملعقة كبيرة صويا صوص , 

2 مكعب مرقة , ملح , فلفل , بهارات , كمون , قرفة , كسبرة ناشفة , جوزة الطيب , 1/2 ملعقة كبيرة كارى , 

1/2 ملعقة كبيرة زعتر , كوب ماء .

الطريقة ..

ناخذ كل البهارات ونخلطها مع بعضها ناخذ نصها نضعها على الفراخ مع ملعقة ثوم مفروم ونقلبهم كويس مع 

بعض ونسيبهم لمدة 3 ساعات .

بعد ذلك نحضر طاسة ونضع فيها زيت ولما يسخن نضع قطع الفراخ ونحمرها وبعد ذلك نشيلها ونضعها على جنب , 

ثم نضع فى الطاسة شوية زيت مرة أخرى ونضع فيها البصل لحد ما يصفر لونة وبعدين نضيف الثوم ونقلبهم كويس ,

وبعدين نضع عصير الطماطم علية ثم نخلط الصلصة مع الصويا الصوص وننزل عليهم فى الطاسة ونوطى 

عليها ونسيبها لحد ماتتسبك ثم نضيف باقى التوابل ونضع كوب الماء ولما تغلى نضيف مكعبين المرقة بعد ذلك 

نضيف الفراخ ونسيبها لحد ماتستوى وبعد كدة نضعها فى صنية وندخلها الفرن ونحمر وشها تحت الشواية .

وتقدم مع الأرز الأبيض أو العيش المحمص .

وبالهنا والشفا .

صنية كور البطاطس

صنية كور البطاطس

شكل وطعم حكاية 

المقادير ..

كيلو بطاطس مغسولة ومسلوقة , صدور فراخ مقطعة مكعبات , بصلة , قرن فلفل أخضر , 

2 جزرة مبشورة , ملح , فلفل , بهارات , كركم , جبنة شيدر مبشورة , كوب كريمة طبخ , 

علبة قشطة , جبنة موزريلا .

الطريقة ..

اولأ : نجهز الحشوة بوضع طاسة على النار ونضع فيها ملعقتين زيت ونقطع البصل قطع صغيرة 

ونضعها فى الطاسة ونقلبها لحد ما تدبل , ثم نضع قطع الفراخ ونشوحها مع البصل ونضع 

شوية ملح وفلفل وبهارات وكركم ونفضل نقلب فى الفراخ لحد ماتنزل مايتها وتغير لونها , 

ثم نضيف الجزر والفلفل الاخضر مقطع ونوطى عليها النار ونسيبها لحد ماتشرب مايتها

وتستوى ونتركها على جنب .

ثانيا : نحضر طبق ونضع فية البطاطس المسلوقة ونضع عليها شوية ملح وفلفل وملعقتين زبدة 

ونهرسها كويس ونحضر قالب بايركس وناخد جزء صغير من البطاطس ونفردة فى القالب 

من تحت وبعد ذلك نضع الحشو المحضر ونيجى على باقى البطاطس نحط كوب جبنة 

شيدر مبشورة ونقلبها كويس وبعدين ندهن ايدينا زيت وناخد قطع صغيرة من البطاطس 

ونكورها ونرصها على الحشو حتى تنتهى كمية البطاطس .

 وبعد ذلك نحضر كوب كريمة ونضع عليها علبة القشطة ونضربهم كويس مع بعض وبعدين 

نحطها على البطاطس وبعد ذلك نرش على وشها جبنة موزريلا 

وندخلها الفرن لمدة نص ساعة وبعدين نولعها الشواية لحد ما يحمر وشها .

 وبالهنا والشفا ..

الكانتون الصيني

طريقة عمل الفراخ الكانتون الصينى 

أوعا الجديد الفراخ الصينى 

المقادير ..

1/2 كيلو صدور فراخ مكعبات , كوب دقيق , ملعقة صغيرة ملح , ملعقة صغيرة فلفل , 

ملعقة كبيرة بابريكا , بصل , جوانح , ثوم , جزر مقطع , فلفل أخضر , ملعقة كبيرة نشا , 

1/4 كوب ماء , ملعقة كاتشب , ملعقة كبيرة صويا صوص , ملعقة خل . 

الطريقة ..

نحضر طبق ونضع فية الدقيق والفلفل والملح والبابريكا ونضع فيها مكعبات الدجاج  ونقلبها 

كويس فى الدقيق .

نحضر طاسة ونضع فيها زيت للقلى وناخد قطع الدجاج ونحمرها فى الزيت , 

ثم نخرجها فى طبق ونتركها على جنب .

نحضر طاسة أخرى ونضع فيها 3 ملاعق زيت ولما يسخن نضع البصل والثوم 

ونشوحهم ولما يدبلو نضع الجزر والفلفل والاخضر ونشوحهم كويس مع بعض , 

وبعدين نضع عليهم الكاتشب والصويا والخل ونقلبهم كويس مع بعض ثم 

نزل بقطع الدجاج على الخليط ونقلبهم كويس مع بعض ونوطى النار عليهم , 

وبعدين ندوب ملعقة النشا فى 1/4 كوب الماء وننزل بية على الفراخ والخضار ونقلب بسرعة 

حتى يتماسك الخليط ونوطى النار شوية ونتركها لمدة من 10 الى 15 دقيقة .

وبكدة تبقا جاهزة أحلى فراخ على الطريقة الصينية .

ملحوظة 

عايزة تضيفى أى نوع خضار بتحبية ضفية .

وبالهنا والشفا ...

فراخ بالكارى

طريقة عمل الفراخ بالكارى 

الفراخ بالكارى الجنان 

المقادير ..

فرخة مقطعة 8 اجزاء أو صدور فراخ مكعبات , 1/2 كوب لبن رايب , 2 ملعقة كبيرة كارى ,

ملعقة ملح , ملعقة فلفل أسود , ملعقة صغيرة روزمارى , 1/4 كوب عصير ليمون , 

1/4 كوب خل تفاح , 1/2 كوب ماء .

الطريقة ..

نحضر طبق ونضع فية الخل واللبن الرايب والروزمارى وشوية ملح وفلفل ونقلبهم كويس 

مع بعض ثم نضع قطع الفراخ ونسيبها منقوعة فى الخليط لمدة ساعتين .

بعد الساعتين نحضر طبق أخر ونضع فية 1/2 كوب الماء والكارى والليمون وشوية ملح وفلفل ,

ثم نشيل الفراخ من الخلطة الاولى ونضعها فى الخلطة الثانية ونقلبها كويس ونسيب الفراخ لمدة ربع ساعة .

نحضر صنية وناخد قطع الفراخ و نرصها ونضع عليها باقى الخليط وشوية صغيرين من الخليط الاول , 

ثم نغطيها بالورق الفويل وندخلها الفرن لحد ما تستوى وما نسيبهاش تنشف قوى ونسيب فيها شوية صوص .

وبكدة تكون جاهزة وتقدم مع أرز بسمتى بالكارى .

وبالهنا والشفا .

ونزوقها بشوية بقدونس .

استيك بصوص المشروم

طريقة عمل استيك بصوص المشروم 

طعم جنان وشكلة تحفة 

المقادير ..

1/2 كيلو استيك , بصلة مقطع قطع صغيرة , ثوم مقطع قطع صغيرة , 6 حبات مشروم قطع صغيرة ,

 كوب كريمة طبخ , ملح , فلفل , جوزة الطيب و توابل لحمة .

الطريقة ..

نتبل اللحمة بملح وفلفل وجوزة الطيب وتوابل اللحمة  وبعدين نحضر طاسة ونضع 

فيها ملعقين زبدة ولما تسخن نضع قطع الاستيك ونعمل لها صدمة من الجنبين 

ولما تحمر من الجنبين نشيلها فى طبق بعدين وفى نفس الطاسة نضع البصل 

والثوم ونشوحهم وبعد ذلك نضع المشروم ونقلبة مع البصل والثوم لحد ما 

يتكرمل وبعدين نضيف كوب كريمة طبخ ونقلبهم كويس ونسيبة لحد ما 

يغلى وبعدين نضع قطع الاستيك فية ونسيبهم يغلو مع بعض

لحد ما اللحمة تستوى ثم نطفى عليها .

وتقدم مع طبق خضار مشوى على الجريل .

بالهنا والشفا ..

الأرز باللبن

طريقة عمل الأرز باللبن 

طعم جنان أحلى تحلية بعد الأكل 

المقادير ..

2 كيلو لبن , كوب الاربع أرز , سكر , 2 ملعقة كبيرة نشا , ربع كوب ماء , 

فانيليا , جوز هند , زبيب ومكسرات للتزيين .

الطريقة ..

اولأ - نغسل الأرز وننقعة لمدة ساعة بعد ذلك نصفى الماء ونضع الأرز فى الخلاط وعلية 

1/2 كوب ماء ونضربة فى الخلاط لحد مايتكسر شوية وبعد كدة نضع اللبن بارد علية 

ونضعة على النار ونقلبة من وقت لأخر لحد ما الأرز يستوى معايا .

بعد ذلك نضيف السكر حسب الرغبة وبعدين ندوب النشا فى ربع كوب الماء وننزل بية 

على اللبن والأرز ونقلب بسرعة ولما يغلى نوطى البوتجاز لحد ما يتخن معايا اللبن .

بعد ذلك نطفى علية ونضع علية ذرة فانيليا ثم نصبة فى كاسات التقديم 

ونزينة بجوز الهند والزبيب والمكسرات ونتركة حتى يبرد .

ثم نضعة فى الثلاجة وممكن تعملى صوص كراميل وتضعية على الوش بدل المكسرات .

ملحوظة :

ممكن اللبن يتخن معاكى من غير ما تضعى النشا وفى الحالة دى لا تضعى النشا لأن الأرز 

بيكون مسك مع اللبن .

وبالهنا والشفا .

ورقة اللحمة

طريقة عمل ورقة اللحمة 

لو عملتيها مرة مش هتبطلى تعمليها 

جميلة قوى ورقة اللحمة بالبطاطس .

المقادير ..

كيلو بطاطس , كيلو الا ربع لحمة , 2 بصلة , 2 ثمرة طماطم ,  2 قرن فلفل , 2 حبة كوسة , 

1/2 كوب بسلة , جزرة , ملح , فلفل , بهارات لحمة .

الطريقة ..

نقشر البطاطس ونقطعها دواير ونغسلها كويس ونضعها فى طبق كبير ونقطع اللحمة 

ونضعها على البطاطس ونضع البسلة والجزر ونقطع الكوسة دوائر .

 ونقطع البصل دوائر ونقطع طماطماية واحدة ونضع الملح والفلفل وبهارات اللحمة 

وندعكها بالبصل كويس ونضعها على البطاطس واللحمة ونقلب كلة على بعضة .

نحضر صنية ونضع فيها ورقة فويل أو ورقة زبدة ونضع فيها 3 ملاعق سمنة ولو فى قطعة 

دهن من بتاع اللحمة نضعها فى أرضية الورقة وبعد ذلك نضع البطاطس واللحمة فى 

الورقة وبعدين نضع على وشها طرنشات الطماطم والفلفل , 

ونتركها ساعة تتبل عشان يبقا طعمها حلو .

بعد ذلك نضع عليها كوب ماء ونقفل الورقة كويس ونضع خارج الورقة 

كوب ماء أخر ونضعا على البوتجاز من فوق ولما تغلى ندخلها الفرن 

لحد ما تستوى وممكن فى الأخر تفتحى الورقة وتحمرى وشها .

وبالهنا والشفا .

المحوجة

طريقة عمل المحوجة 

المقادير ..

2 ونص كيلو دقيق , كيلو وربع سكر , 1/2 كيلو زيت , 1/2 كيلو سمنة , 

سمسم , 1/2 كوب محوجة من العطار , باكو بيكنج بودر ,

 2 ونص وقية خميرة بسكويت من العطار , ذرة ملح , 2 كوب ماء .

الطريقة ..

أولا ننقع السكر فى كوبيتين الماء ونسيبهم على جنب بعد ذلك نضع الدقيق وعلية 

نص كمية السمسم وعلية باكو البودر وخميرة البسكويت وذرة الملح ونقلبهم مع بعض ,

وبعد كدة نضع السمنة والزيت ونقلبهم ونفركهم معا الدقيق وبعدين نضع السكر المنقوع بالماء ,

ونعجن لحد ما تصبح عندى عجينة .

نحضر الصوانى وندهنها كويس بالزيت ونقسم العجينة وناخد قطعة عجين على قد الصنية ونعوص ادينا 

زيت ونفرد العجين كل مرة نفرد فيها العجينة نعوص أدينا فيها زيت واحنا بنفرد ونرش على 

وشها السمسم وندخلها الفرن لحد ما تستوى .

وبكدة تبقا جاهزة معانا أحلى محوجة مع كوب الشاى للفطار .

البصارة

طريقة عمل البصارة 

أكلة مصرية شعبية رهيبة 

المقادير ..

1/2 كيلو فول مدشوش , بصلة كبيرة , ثوم , 2 ثمرة طماطم , حزمة كسبرة خضرا صغيرة , 

ملح , كمون , بصلة محمرة للتزيين .

الطريقة ..

ننقع الفول قبلها بليلة او ننقعة لمدة 6 ساعات نحضر حلة ونضع فيها 2 ملعقة سمنة ونحمر فيها بصلة 

مقطعة دوائر او مربعات ولما تحمر نشلها فى طبق على جنب .

بعد ذلك نضع فى نفس الحلة الفول وعلية البصلة المقطعة نصين والثوم الطماطم والكسبرة الخضرا 

ونضع عليها ماء لحد ما يبقا الفول متغطى بس مش كتير ونغطى علية ونسيبة لحد ما الفول 

يستوى زى شربة العدس وبعد ما يستوى نضعة فى الخلاط ونضربة كويس جدا .

بعد ذلك نضع ملعقتين سمنة ولما تسخن السمنة ننزل بالفول بعد ضربة فى الخلاط 

ونضع علية الملح والكمون ونسيبة لما يغلى ويبقا سميك شوية مش خفيف .

وبعد ذلك نغرفة فى اطباق التقديم ونرش علية البصل المحمر .

ويقدم مع العيش المحمص .

بالهنا والشفا ..

شرائح اللحمة على الطريقة اللأيطالية

طريقة عمل شرائح اللحمة على الطريقة الأيطالية 

لمحبى التجديد فى الاكل جربوا اللحمة الايطالية 

المقادير ..

1/2 كيلو لحمة مقطعة شرائح , فلفل الوان مقطع شرائح , بصلة مقطعة شرائح , 

1/2 كوب زيتون أخضر مقطع شرائح , 1/2 ملعقة روزمارى , 1/2 كيلو عصير طماطم , 

1/2 ملعقة جوزة الطيب , 2 فص ثوم مقطع , 2 ملعقة كبيرة زبدة , ملح و فلفل .

الطريقة .. 

نضع حلة على النار ونضع فيها الزبدة وبعدين نضيف البصل والثوم ونقلبة لحد ما يبقا لونة 

ذهبى وبعدين نضع شرائح اللحمة ونقلبها كويس لحد ما يتغير لونها وبعدين نضيف
الفلفل الالوان ونقلبهم مع بعض من 5 الى 10 دقائق وبعدين نضيف الروز مارى 

والملح والفلفل وجوزة الطيب ونقلبهم كويس وبعدين نضيف عصير 

الطماطم والزيتون الاخضر ونغطى عليها لحد ما تستوى 

وبعدين نطفى عليها ونقدمها مع البطاطس المحمرة .

بالهنا والشفا ...

فطيرة التفاح

طريقة عمل فطيرة التفاح 

فطيرة التفاح هتعجب كل العيلة .

المقادير ..

مقادير العجين / 3 كوب دقيق , 1 ونص كوب زبدة , 1/2 كوب سكر بودرة , 

بيضة , فانيليا , 1/4 كوب ماء بارد .

مقادير الحشو / 5 حبات تفاح , 1/4 كوب سكر عادى , 2 ملعقة صغيرة قرفة , 1/4 كوب ماء , 

عصير ليمونة , ملعقة كبيرة نشا , 1/2 كوب عين جمل حسب الرغبة .

الطريقة ..

الحشو / نقشر التفاح ونقطعة مكعبات ونضعة فى حلة على النار ونضع علية السكر والقرفة 

ونقلبة تقليبة بعدين نضيف عصير الليمون وبعدين نجيب النشا وندوبة فى 1/4 كوب 

ماء وبعدين نضعة على التفاح ونقلبة لحد ما يتماسك ونسيبة شوية وبعدين نضع 

علية عين الجمل ونطفى علية .

العجين / نحضر طبق ونضع فية الدقيق وعلية الزبدة ونفركة بأدينا لحد ما يبقا عندى عجينة 

مفتتة زى الرمل بعد ذلك نضيف السكر البودرة عليها ونقلبها وبعدين نضيف البيضة 

ورشة الفانيليا ونقلبها وبعدين نضيف الماء شوية شوية لحد ما يبقا عندى عجينة 

متماسكة وبعدين نلفها فى نايلون وندخلها الثلاجة لمدة 1/2 ساعة .

بعد ذلك نخرج العجين من الثلاجة ونقسمها نصين ونفردهم , 

ثم نحضر صنية ونضع الطبقة الأولة من العجين ونساويها فى الصنية وبعدين نضع 

فى نص العجين الحشو وبعدين نضع الطبقة الثانية من العجين على الحشو وبعد ذلك 

نعمل لها فتحات بالسكين من الوش , ثم ندخلها الفرن على درجة حرارة 180 لحد 

ماتستوى وتحمر .

ولما تخرج من الفرن نرش على وشها سكر بودرة .

وبكدة تبقا جاهزة معانا أحلى فطيرة تفاح . 

وبالهنا والشفا ...

هتعجبكوووا قوووى .

صنية البطاطس بالبشاميل واللحمة المفرومة

طريقة عمل صنية البطاطس بالبشاميل واللحمة المفرومة 

المقادير ..

7 حبات بطاطس مسلوقة , 1/2 كيلو لحمة مفرومة معصجة , بشاميل , 2 ملعقة زبدة , 

ملح , فلفل , ربع كوب لبن , ملعقة صغيرة ثوم بودر , ملعقة صغيرة بصل بودر , 

1/4 ملعقة صغيرة كركم .

الطريقة ..

لعمل البشاميل ..

نحضر حلة ونضع فيها ملعقة زبدة و3 ملاعق زيت ولما يسخن نضع 2 ملعقة كبيرة دقيق ونحمرها , 

وبعد ذلك نضع 1/2 كيلو لبن حليب دافئ ونقلبهم بسرعة بالمضرب اليدوى لحد ما يتماسك ,

ثم نوطى النار ونضيف الملح والفلفل ومكعب مرقة اذا حبيتى .

طريقة البطاطس ..

نحضر طبق ونضع فية البطاطس وعليها الثوم والبصل البودر والملح والفلفل والكركم وملعقتين 

الزبدة واللبن ونهرسهم كويس , ثم نحضر صنية ونضع 1/2 كمية البطاطس المهروسة 

ونسويها فى الصنية ثم نضع اللحمة المفرومة المعصجة ممكن تتضيفى مع اللحمة 

بسلة وجزر مسلوقين , بعدين نفرد باقى كمية البطاطس على اللحمة , 

بعد ذلك نضع البشاميل على الوش وممكن ترشى على وشها جينة رومى مبشورة او 

موتزاريلا وندخلها الفرن 1/2 ساعة من تحت وبعدين نولع الشواية نحمر وشها .

تاكل بالعيش أو بالمكرونة .

وبالهنا والشفا ....

كيكة بكريم كراميل

طريقة عمل الكيكة بكريم كراميل 

لعشاق الكيك الشهى 

المقادير ..

كوب زيت , كوب سكر ناعم , كوب لبن , 2 باكو كريم كراميل , 2 بيضة ,

فانيليا , كوب دقيق , 1/2 باكو بيكنج بودر .

الطريقة ..

نضع الزيت والسكر واللبن فى الخلاط ونضربهم كويس وبعدين نضيف الكريم كراميل

( الكريم بدون الكراميل الكراميل للتزيين ) 

بعد ذلك نضربهم فى الخلاط كويس حتى يتجانس الخليط , ثم نحجز كوب من الخليط ونركة 

على جنب , وعلى باقى الخليط نضيف 2 بيضة ورشة فانيليا ثم نضربهم ,

بعد ذلك نضيف الدقيق والبيكنج بودر ونقلبهم كويس , ثم نحضر صنية مدهونة ومبطنة 

برشة دقيق ونضع فيها الخليط ثم ندخلها الفرن حتى تستوى بعد ما تخرج من الفرن نضع 

عليها كوب نضع عليها الكوب المحجوز المحضر مسبقا ونزينها بكسين 

الكراميل الى كانو مع الكريم كراميل وندخلها الثلاجة لمدة ساعة .

ثم تخرج من الثلاجة وتقدم مع كوب شاى أو نسكافية .

بالهنا والشفا ..

دبابيس الفراخ الحارة

طريقة دبابيس الفراخ الحارة 

حارة وجميلة تفتح النفس على اللأكل 

المقادير ..

كيلو دبابيس فراخ , 2 ملعقة كبيرة سمسم , 3 ملاعق كبيرة زيت , 2 ملعقة كبيرة خل , 

2 ملعقة كبيرة كاتشب , ملعقة كبيرة مستردة , 2 ملعقة كبيرة سكر , بصلة مقطعة قطع صغيرة , 

فص ثوم , ملعقة كبيرة هوت صوص حار قطع , ملح , فلفل و قرن شطة حار .

الطريقة ..

نضع الزيت والخل والكاتشب والمستردة والبصل والسكر والثوم والهوت صوص والملح
والفلفل وقرن الشطة الحار ونضربة فى الخلاط لحد ما يتجانس .

نحضر طبق ونضع فية الدبابيس بعد غسلها كويس نضع عليها الخليط السابق وننقع فية الفراخ 

لمدة ساعتين , ثم نحضر صنية ونرص فيها الدبابيس ونضع عليها باقى الخليط الى كان 

منقوع فية وبعدين ندخلها الفرن ولما تستوى نشغل الشواية ولما تخرج نرش 

عليها السمسم .

يقدم مع الأرز والسلطات .

وبالهنا والشفا ..

كفتة بالطحينة

طريقة عمل الكفتة بالطحينة 

المقادير ..

1/2 كيلو لحمة مفرومة , 2 بصلة وسط مفرومة , بقدونس مفروم , 3 فص ثوم مفروم , 

ملح , فلفل , بهارات , جوزة الطيب , زنجبيل .

مقادير الصوص / علبة زبادى صغيرة , كوب طحينة , 1/4 كوب عصير ليمون , 3 ملعقة زيت , 

2 فص ثوم مفروم , بصلة وسط مفرومة .

الطريقة ..

اولا اللحمة ..

نضع اللحمة وعليها البصل والثوم والبقدونس والملح والفلفل والبهارات وجوزة الطيب 

والزنجبيل ونقلبهم كويس مع بعض لحد ما كل المكونات تتجانس مع بعض .

نقوم بتصبيع اللحمة كفتة ونحضر طاسة ونضع فيها زيت ونحمر الكفتة 

ولما تحمر نشلها ونركنها على جنب .

ثانيا الصوص ..

نحضر حلة ونضعها على البوتاجاز ونضع فيها الزبادى والطحينة والليمون والملح

 ونقلبهم حتى تصبح مثل الكريمة وبعدين نطفى عليها ونسيبها على جنب .

نحضر الطاسة المحمر بها الكفتة ونضع فيها شوية زيت ونضع فيها بصل 

والثوم وشوية ملح ولما يدبل البصل نضع علية صوص الطحينة ونقلبة كويس , 

بعد ذلك نحضر صنية ونرص فيها الكفتة المحمرة ونضع فيها صوص الطحينة المضاف للبصل ,

ثم نولع الفرن وندخلها لمدة من 15 الى 20 دقيقة .

لما تخرج من الفرن نزينها بالبقدونس .

وبالهنا والشفا .